A Deputación abre as inscricións ás actividades medioambientais vencelladas ao ocio saudable
As actividades gratuítas levaranse a cabo dende este xoves, 16 de setembro, ata finais de decembro , principalmente no entorno natural da Reserva da Biosfera Terras do Miño
Esta semana o programa comeza cunha conferencia sobre Macrofungos do noso medio e, a vindeira semana, continuará cun programa de Cores de Outono e a interpretación dos fungos no medio ambiente
A Deputación de Lugo pon en marcha, a través do Servizo de Medio Ambiente, unha nova programación que inclúe cinco actividades gratuítas para fomentar o ocio saudable entre os veciños e as veciñas da provincia na contorna da Reserva da Biosfera Terras do Miño, un territorio xestionado pola propia institución provincial. Estas propostas levaranse a cabo dende o este xoves, 16 de setembro, ata finais de ano e están pensadas para o público en xeral ou para o familiar.
As actividades levaranse a cabo no Centro de Interpretación Terras do Miño e as persoas interesadas xa poden inscribirse a través da páxina web http://inscricions.deputacionlugo.org/gl/tema/actividades-medioambientais. A primeira proposta será unha conferencia sobre os Macrofungos no noso medio, destinada a adultos. No mes de setembro tamén se levarán a cabo as actividades Cores de outono e a Interpretación dos fungos no medio ambiente do 20 ao 24 de setembro e o 25 de setembro, respectivamente.
En outubro, do 18 ao 22, levarase a cabo O balcón comestible: horticultura en macetas. Novembro será o mes onde se leven a cabo a meirande parte das actividades, cun curso completo sobre O reino fungi na natureza, con parte teórica e práctica, ou a Iniciación e boas prácticas medioambientais na produción de mel, que se levará a cabo do 15 ao 26 en horario de mañá.
As actividades continuarán o 20 de novembro coa Práctica de recoñecemento de macromicetos e un Obradoiro de Cestaría, do 29 de novembro ao 3 de decembro. O programa remata con dous talleres enfocados á tapicería, do 13 ao 17 de decembro, e á ecoloxía no Nadal, do 27 ao 30 de decembro.
As iniciativas, debido ás actuais restricións sanitarias, contan cun número de prazas reducido e os interesados e interesadas en participar deberán inscribirse con anterioridade. As persoas interesadas poden recibir máis información na web da institución provincial, no teléfono 982.305.930 ou no correo und.medioambiente@deputacionlugo.org
