A Vicepresidencia da Deputación financiou a rexeneración do céspede do Estadio Martínez Otero de Foz

Lugo, 4 de setembro de 2026.- A Vicepresidencia da Deputación, a través da área de Mocidade, financiou a rexeneración do céspede do Martínez Otero de Foz, deteriorado tras o uso continuado do terreo de xogo durante a tempada de competicións.

A intervención supuxo un investimento de preto de 10.000 euros . Os traballos no campo, executados polo club como responsable do mantemento da instalación, incluíron a eliminación de material vexetal deteriorado, descompactación do terreo, recebado con area silícea, resembra de céspede e fertilización.

O deputado Daniel García visitou o campo xunto a membros da directiva do CD Foz que valoraron a mellora das condicións do campo tras a intervención. O deputado explicou que "se trata dunha achega excepcional que aminora o investimento que supón para o club o mantemento das instalacións e, nese sentido, incide na rede de apoio que a Vicepresidencia da Deputación ofrece ao tecido deportivo da provincia,  ofrecendo soporte económico a clubs que, como o CD Foz, ademais de fomentar o deporte son parte da identidade e da vida social dos seus concellos".

O Martínez Otero é o campo de xogo habitual do equipo sénior do CD Foz, que xoga este domingo o primeiro encontro de Liga contra a Residencia.