A Deputación e a Federación de Comercio sortearán 90 bonos de 250€ para facilitarlle ás familias a volta ao cole

O Presidente da Deputación de Lugo, José Tomé Roca, e o Presidente da Federación Galega de Comercio, José María Seijas López, presentaron este venres na Praza de San Marcos unha iniciativa mediante a que sortearán un total de 90 bonos, por valor de 250€, para facilitarlle ás familias a volta ao cole. A institución provincial investirá 50.000€ nesta proposta que incentivará a compra nos pequenos negocios da provincia e aliviará a economía doméstica “nun dos momentos máis delicados do ano”.

“Esta é unha aposta estratéxica do noso Goberno”, valorou o mandatario provincial. Nese sentido, explicou que o comercio representa máis do 26% do tecido empresarial da provincia e que máis de 9.400 empresas de Lugo están vinculadas a esta actividade, sendo o segundo sector económico máis numeroso tras o agrícola-gandeiro. Detallou que máis do 96% desas empresas comerciais contan con menos de 10 traballadores, polo que o pequeno comercio “ten un peso enorme na xeración de emprego e de actividade no noso territorio”.

Destacou ademais que o pequeno comercio “é un motor imprescindible de cohesión social, especialmente nos concellos rurais. Alí, os comercios son moito máis que un punto de compra: son un servizo básico, espazos fundamentais de convivencia, que fomentan a economía circular e son quen de fixar poboación”. Ao respecto, o Presidente puxo en valor a colaboración continua coa Federación de Comercio para iniciativas puntuais como a que presentaron esta mañá, ou para que a entidade poida manter servizos aos comerciantes durante todo o ano.

No que ten que ver coas familias, Tomé Roca sinalou que a volta ao cole “é un dos momentos máis delicados do ano para a economía familiar. En poucos días, acumúlanse gastos que non se poden pospoñer e que supoñen un esforzo enorme, sobre todo cando hai varios fillos en idade escolar. Estamos a falar de varios centos de euros, que varían segundo o centro e o tipo de ensinanza”.

Polo tanto, valorou o Presidente, con esta campaña “estamos a facer o que mellor sabemos nesta casa: apoiar ás persoas” e animou a todo o mundo a participar nun proxecto que contribúe a facer provincia.

Pola súa banda, Seijas apuntou que “tanto a Deputación como a Federación estamos sempre no constante reto de adaptarnos ás novas circunstancias dos nosos establecementos, do noso sector, e tamén ás novas demandas e necesidades dos consumidores lucenses”. Nese sentido, sinalou que a volta ao cole “supón precisamente un dos momentos do ano máis gravoso para as economías familiares” e valorou que nese contexto consideraron “necesario canalizar todo ese consumo, que se realiza nesta tempada, cara ao comercio local, o que da vida e riqueza á nosa provincia.
 
“Estimamos a importancia de colaborar coas familias lucenses para contribuír a suavizar o impacto de todos estes gastos nas súas economías domésticas; máis aínda tendo en conta a tendencia inflacionista que se ven producindo e que fai más complicado aínda afrontar esta tempada”, engadiu o presidente da entidade.
 

Como participar na campaña

As persoas interesadas en participar nesta campaña da Deputación e da Federación de Galega de Comercio para a volta ao cole deberán comprar no comercio local da provincia entre o luns 1 de setembro e o martes 30 dese mesmo mes, gardar o tícket e rexistrarse na páxina web: https://www.bonosdeputacionlugo.com/. O xoves 2 de outubro terá lugar o sorteo dos bonos nos que se repartirán un total de 22.500€ en tarxetas regalo, que serán empregadas para volver a mercar nos pequenos establecementos de Lugo ata o 31 de decembro.

Realizarase de forma presencial un sorteo adicional dunha tarxeta prepago de 2.500€ que o gañador deberá empregar nunha única xornada de compras e nunha soa localidade de Lugo. Poderán participar todos os consumidores que asistan ao acto de entrega de premios da campaña, o 16 de outubro ás 19:00 horas no Salón de Actos da Deputación, aportando un tícket ou factura nun comercio físico dalgún dos 67 concellos da provincia entre o 1 de setembro e o 16 de outubro.