A Deputación recibe a moeda oficial da Cohors III Lucensium para o Arde Lucus 2025

A Deputada de Réxime Interior, Promoción do Territorio e Turismo, Pilar García Porto, recibiu este martes da man dos membros da Asociación Cultural de Recreación Histórica Cohors III Lucensium a moeda oficial creada por esta entidade para a celebración do Arde Lucus 2025. Nesta ocasión, a peza inclúe unha representación da Muralla Romana, con motivo do 25º aniversario de declaración como Patrimonio da Humanidade; o emperador Aureliano; e un xabaril, que é o símbolo da Cohors.

Durante o encontro, que tivo lugar no campamento da Cohors III Lucensium instalado diante da Casa Consistorial de Lugo, García Porto recordou que “esta é unha das principais asociacións de recreación histórica de Lugo que tivo presenza desde o comezo desta festa hasta hoxe”. A Deputada recordou tamén que “desde a institución provincial valoramos moi positivamente esta celebración por todo o que significa para a cidade de Lugo e para todo o conxunto da provincia tanto polo recoñecemento da súa historia, como polo que implica a nivel económico”.