ALUCEM recoñece o apoio da Deputación na celebración polo seu 30 aniversario
O Deputado de Formación, Ensino e Economía do Coñecemento, Miguel Fernández, participou este sábado no 30 aniversario da Asociación Lucense de Esclerose Múltiple (ALUCEM). Na cita, que tivo lugar no Hotel Méndez Núñez, o colectivo fíxolle entrega ao responsable provincial dunha placa en recoñecemento do apoio prestado pola Deputación de Lugo estes anos.
“Detrás desta placa hai 30 anos de compromiso coas persoas”, valorou o Deputado. Puxo en valor o traballo de ALUCEM, “un referente social desta provincia e un lugar moi importante para moitas persoas que atoparon aquí orientación, apoio e tamén ánimo nos momentos máis complicados”, sinalou. Engadiu que desde a Deputación “recibimos esta distinción con orgullo, claro que si, pero sobre todo cunha gratitude moi sincera. Grazas polo exemplo que dades, polo traballo de tantos anos e por facer desta provincia un lugar mellor e máis humano”.
A Deputación de Lugo colabora con ALUCEM cunha achega de 10.000€ que se repite todos os anos e que axuda a desenvolver un programa de atención integral, destinado a cubrir as necesidades específicas dos pacientes. Entre outras cuestións, esta iniciativa facilita servizos de fisioterapia e atención psicolóxica desta doenza.
