A Deputación chama a romper estereotipos e barreiras de xénero no Día Internacional da Muller e a Nena na Ciencia
O Salón de Actos do Pazo de San Marcos acolleu a charla Muller na ciencia da investigadora lucense Cintia Folgueira, no marco da programación que ten en marcha o Concello de Lugo con motivo desta xornada, que se celebra cada 11 de febreiro
A Deputada de Muller e Igualdade, Marisol Morandeira Morandeira, inaugurou esta cita á que asistiron uns 150 alumnos e alumnas de terceiro e cuarto curso da ESO do Colexio FEC San José e do Colexio Fingoi
A Deputada de Muller e Igualdade, Marisol Morandeira Morandeira, inaugurou este mércores xunto á edil de Muller e Igualdade do Concello de Lugo, Ángeles Novo, a charla Muller na ciencia, impartida pola bióloga e investigadora lucense Cintia Folgueira. Esta cita, que tivo lugar no Salón de Actos do Pazo de San Marcos e á que asistiron uns 150 alumnos e alumnas de terceiro e cuarto curso da ESO dos colexios FEC San José e Fingoi, enmárcase dentro da programación organizada pola área de Igualdade do Concello de Lugo para conmemorar o Día Internacional da Muller e a Nena na Ciencia, que se celebra cada 11 de febreiro.
Marisol Morandeira recalcou que “hoxe queremos dar visibilidade ao traballo de mulleres referentes no ámbito científico, mulleres que, como Cintia, desempeñan un papel fundamental na comunidade científica. O seu exemplo axúdanos a entender a importancia de contar con referentes femininos nun ámbito no que durante moito tempo as mulleres foron invisibilizadas ou tiveron que superar máis obstáculos para facer valer o seu talento”.
Nesta liña, fixo especial fincapé no “camiño que queda por recorrer” destacando que “aproximadamente só 1 de cada 3 investigadores científicos son mulleres; a porcentaxe de mulleres que se gradúan en ciencia, tecnoloxía, enxeñaría ou matemáticas está no 35% e os postos de maior responsabilidade ocupados por mulleres seguen sendo unha clara minoría: só o 10%”.
“Para igualar estas cifras e lograr un ámbito científico máis xusto e igualitario, é fundamental apoiar o talento das nenas e mozas, ofrecervos referentes femininos nos que inspirarvos, e garantir que todas as persoas poidan seguir a súa vocación científica sen limitacións nin estereotipos”, finalizou.
Pola súa banda, Ángeles Novo avanzou que “é importantísimo conmemorar esta xornada por todas as complicacións que tivemos as mulleres ao longo da historia”. Agradeceu tamén a colaboración de Cintia Folgueira “unha investigadora destacada no estudo dos mecanismos que regulan o metabolismo enerxético; forma parte da Academia Joven de España; é Doutora en endocrinoloxía pola Universidade de Santiago de Compostela e na actualidade traballa no Instituto de Investigación Sanitaria de Santiago de Compostela”.
