A Deputación prepara unha festa cos Bolechas para acender o Nadal en San Marcos este xoves
A Deputación de Lugo prepara unha festa cos Bolechas para acender o Nadal en San Marcos este xoves, 4 de decembro. O acto, gratuíto e aberto ao público, comezará ás 19:00 horas coa presentación do último libro dos protagonistas da serie infantil galega Unha viaxe por Lugo. Unha provincia natural e continuará cun repertorio de panxoliñas interpretadas polo Orfeón Lucense.
Marta decide celebrar unha festa normanda en Lugo polo seu aniversario e convida aos Bolechas a percorrer os lugares naturais máis senlleiros da provincia. Así comeza a historia que se presentará no Salón de Actos do Pazo de San Marcos ás 19:00 horas. Estarán presentes algúns dos protagonistas que integran a panda de Braulio, Carlos, Sonia e Pili, que interactuarán cos nenos e nenas presentes.
Ás 19:30 comezarán a soar as panxoliñas na Praza de San Marcos, interpretadas polo coro musical Orfeón lucense. Despois, está previsto que o Presidente da Deputación, José Tomé Roca, acenda xunto aos Bolechas o alumeado de Nadal exterior e interior do edificio histórico. Ata as 20:30 horas, a coral seguirá coas nadaliñas, amenizando a aquelas persoas que estean pola praza.
Este ano, os elementos decorativos da fachada de San Marcos continuarán a empregar tecnoloxía LED de alta eficiencia, e incluirán aos tres Reis Magos, diferentes estrelas, copos de neve e cortinas horizontais e verticais. Como novidade este ano haberá dous arcos de luz ao pé da entrada, xunto a diferentes elementos decorativos. O interior do Pazo tamén estará decorado para a ocasión con adornos e motivos de Nadal.
