Fallados os premios do concurso de fotografía das reservas Terras do Miño e Os Ancares Lucenses
Adxudicado o subministro de dúas máquinas compactadoras para o Parque Móbil por un importe de preto de 90.000€
A voceira socialista do Goberno provincial, Pilar García Porto, informou de que a Xunta de Goberno deste venres aprobou a resolución da comisión avaliadora da sétima edición do Concurso de Fotografía Sendeiros das Reservas da Biosfera Terras do Miño e os Ancares Lucenses.
Lina Iglesias Forneiro, pola súa obra Camiño Primitivo, recibirá o primeiro premio dotado con 800€; Germán Limeres López, coa súa fotografía Lagoa de Cospeito, será galardoado co segundo premio, que está dotado con 500€; e Manuel María Balbas Naveira, que inmortalizou Cores de inverno na senda dos muíños, acadará o terceiro premio, que conta cun importe de 300€. O fallo sairá publicado a semana que vén no Boletín Oficial da Provincia (BOP).
“Coa temática desta edición pretendíamos poñer en valor, dar a coñecer e divulgar o patrimonio natural e cultural destas Reservas da Biosfera que xestiona a Deputación, e que son unha das ferramentas importantes para o desenvolvemento da provincia”, explicou García Porto. A temática incluía, tanto redes de rutas de sendeirismo e itinerarios, como o conxunto de vías e camiños tradicionais, co obxectivo de amosara riqueza natural, cultural e paisaxística das reservas Terras do Miño e Os Ancares Lucenses.
Parque Móbil
Por outra banda, a Xunta de Goberno adxudicou o subministro de dúas máquinas compactadoras para o Parque Móbil da Deputación de Lugo por un importe de preto de 90.000€ e a retirada doutras dúas por un importe de 1.500€. Esta nova maquinaria servirá para dar un mellor servizo nas obras en estradas, xa que serven para acelerar o proceso de compactación da terra grazas aos diferentes rodillos que inclúen.
Subministros para diferentes servizos
A Xunta de Goberno tamén aprobou a licitación de tres contratos de subministros para diferentes servizos da Deputación. Por unha banda, sae a contratación por un importe de máis de 25.100€ a adquisición dun grupo electróxeno para a Granxa Gayoso Castro. Por outra banda, aprobouse a licitación por importe de algo máis de 43.500€ dun contrato para o subministro de pneumáticos para os vehículos e maquinaria tanto do Parque Móbil como da Granxa Gayoso, e outro para o subministro de mobiliario de diferentes servizos da institución provincial por un importe de 91.960€.
Así mesmo, a Xunta de Goberno aprobou a prórroga do encargo a Tragsa, por un período de 6 meses e un importe de 231.000€, do servizo de limpeza dos distintos edificios e dependencias da institución provincial.
