As rutas fluviais da Deputación volven ser unha das principais alternativas turísticas do verán con máis de 32.000 viaxeiros

As rutas fluviais pola Ribeira Sacra impulsadas pola Deputación de Lugo volveron ser este verán un dos atractivos turísticos máis demandados na comarca e no conxunto da provincia. Máis de32.000 persoas desfrutaron entre os meses de xuño e agosto das travesías que parten dos embarcadoiros de Ponte do Sil e Belesar. 

A Deputada de Réxime Interior, Promoción do Territorio e Turismo, Pilar García Porto, fixo este martesun balance moi positivo da temporada estival recalcando que a ocupación media foi de preto do 80%, un dato que “reflicte o interese crecente por unha proposta turística singular, que permite descubrir a Ribeira Sacra desde o río, combinando natureza, patrimonio e tranquilidade”. Este rexistro, indica, cobra máis relevancia se se compara cos datos do pasado ano, cando entre marzo e agosto participaron arredor de 29.000 persoas. “Só no período de xuño a agosto deste verán superáronse os 32.000 viaxeiros, o que reflicte un incremento notable da demanda e a consolidación destas travesías como un dos principais reclamos turísticos da Ribeira Sacra”.

“Estamos moi satisfeitos, son datos moi positivos que confirman, un ano máis, a acertada aposta da Deputación por un modelo turístico sostible e de calidade”, destacou Pilar García Porto, quen ademais destacou o impacto económico directo que xera este servizo na comarca, “as rutas fluviais son un motor para o turismo local, contribuíndo ao desenvolvemento hostalería, o comercio, e xerando riqueza. Cada visitante convértese nun embaixador do territorio, que contribúe a preservar e dar a coñecer o noso patrimonio”.

A campañadas rutas fluviais continúa activa ata o 8 de decembro con dúas rutas dispoñibles: a Ruta Fluvial do Cañón do Sil, con capacidade para 159 prazas, e a Ruta Fluvial do Cabo do Mundo, cunha capacidade de 63 viaxeiros. Esta oferta inclúe tarifas especiais para colectivos, persoas xubiladas, mozos, desempregados e familias numerosas. 

As persoas interesadas en realizar algunha das dúas rutas que ofrece a Deputación de Lugo, reservar praza e consultar máis información poden reservar a súa praza a través da páxina web: https://reservas.rutasembalses.es/. 

Datas e horarios ata fin de tempada

Os viaxeiros poderán facer as rutas todos os días no mes de setembro. Ata o 14 poderán escoller a ruta Canón do Sil en horario de 11:00, 11:30, 16:00, 17:00 e 19:00 horas, ou a de Cabo do Mundo ás 11:30, 16:30 e 19:00. A partir de mediados de setembro os catamaráns non sairán xa á noitiña nin desde o embarcadoiro de Ponte do Sil nin desde Belesar Pobo, polo que deixarán de ofrecerse as rutas das 19:00 e das 19:30, manténdose o resto das opcións horarias. 

No mes de outubro a ruta Canón do Sil ofrecerá servizo no catamarán Mencía de mércores a venres con dous horarios, ás 11:30 e ás 16:30 horas. As fins de semana e os días 8, 9 e 10, coincidindo coa ponte do Pilar, entrará tamén en servizo o monocasco Canón do Sil, ofrecendo entre ambas embarcacións rutas ás 11:00, ás 11:30, ás 16:00 e ás 16:30 horas. A ruta Cabo do Mundoofertará as fins de semana e os días 8, 9 e 10 viaxes ás 11:30 e ás 16:30 horas.

En novembro os viaxeiros só poderán facer rutas en catamarán nas fins de semana. Durante o primeiro fin de semana, con motivo da festividade de Todos os Santos, a ruta Canón do Sil ofrecerá viaxes ás 11:00, ás 11:30, ás 16:00 e ás 16:30 horas. Desde a fin de semana do 8 e 9 de novembro só operará o catamarán Mencía no embarcadoiro Ponte do Sil, con saída ás 11:30 e ás 16:00. A ruta Cabo do Mundo funcionará todo o mes ás fins de semana ás 11:30 e ás 16:00 horas.

O servizo rematará coa ponte de Decembro. Entre os días 1 e 8 desde mes, o embarcadoiro Ponte do Sil e Belesar Pobo ofertarán viaxes ás 11:30 e ás 16:00 horas.