O Presidente entrega os premios do VIII Concurso Fotográfico das Reservas da Biosfera Terras do Miño e Os Ancares
O Presidente da Deputación de Lugo, José Tomé Roca, xunto ao Deputado de Medio Ambiente, Carlos López López, fixeron entrega este xoves no Centro de Interpretación Terras do Miño dos premiosdo VIII Concurso de Fotografía das Reservas da Biosfera, unha iniciativa coa que a institución provincial busca poñer en valor o patrimonio etnográfico material das Reservas da Biosfera xestionadas pola institución: Terras do Miño e Os Ancares Lucenses.
O certame recoñeceu tres traballos destacados entre os 27 presentados nesta edición, que levou por lema O patrimonio etnográfico material das Reservas da Biosfera Terras do Miño e Os Ancares Lucenses. O obxectivo era visibilizar e divulgar construcións tradicionais vencelladas ao aproveitamento sostible dos recursos naturais, como hórreos, muíños, aceas, lavadoiros, fontes, pontellas, cortíns ou pallozas, elementos clave da identidade rural galega.
José Tomé fixo entrega dos cheques en metálico dun total de 1.600 euros en premios aos autores das obras gañadoras. O primeiro premio, dotado con 800€, foi para Javier Cabana Soengas pola obra ARB(H)Ó(R)REO. Raíces dos Ancares. O segundo premio, de 500€, recibiuno Ana María Taboada García pola fotografía Crepúsculo no río Neira. O terceiro, cunha dotación de 300€, foi para Iago Manoel Souto Lorenzo pola imaxe Pota e forno de leña, tradición e patrimonio dos nosos fogares.
José Tomé destacou durante o acto que “con iniciativas como esta achegamos á cidadanía a riqueza e o valor do noso patrimonio rural”. Lembrou o mandatario provincial que este certame forma parte dun programa máis amplo de accións que a Deputación promove nas dúas Reservas, e que inclúe actividades de lecer e educación ambiental para todos os públicos, iniciativas de divulgación científica, apoio ao turismo sostible e ao desenvolvemento local, e o mantemento de infraestruturas como o propio Centro de Interpretación Terras do Miño.
