A Vicepresidencia da Deputación licita a compra e instalación do videomarcador para o Pazo dos Deportes, cun orzamento de 267.000 euros
O vicepresidente da Deputación de Lugo Efrén Castro informou da licitación do contrato de subministración e instalación dun videomarcador no Pazo dos Deportes, cun orzamento base de 267.000 euros.
A Xunta de Goberno aprobou hoxe os pregos de licitación, na que se establecen as características do equipo, establecendo unhas dimensións mínimas de 525 cms x 225 cms nas caras máis grandes e 225 cms x 225 cms nas caras cadradas, cunha superficie gráfica total mínima de 50 metros cadrados.
Atendendo ao estudo de carga da cuberta realizado para preparar a licitación, o contrato especifica que o peso conxunto da estrutura e dos elementos accesorios estará limitado a 2.400 quilos.
Efrén Castro sinalou “que seguimos avanzando na actualización e modernización do Pazo dos Deportes con outro investimento importante de 267.000 euros, que dotará a instalación dun equipo de videomarcador versátil no que se poderán proxectar todo tipo de contidos multimedia”
Os pregos marcan un prazo de execución de 30 días desde a formalización do contrato. O videomarcador instalarase no centro da pista, cunha distribución de peso planificada no estudo de carga da cuberta.
Seguen as obras de reparación integral da cuberta
Entre tanto, continúan as obras de rehabilitación integral da cuberta do Pazo, que comezaron o pasado mes de maio.
A intervención, que supón un investimento de 600.000 euros, suporá a impermeabilización dos 8.500 metros cadrados de superficie da cuberta cunha membrana de poliurea. Tamén se actuará sobre a instalación de evacuación de aguas pluviais impermeabilizando as canles e renovando os entronques coas baixantes. Ademais incrementarase o número de baixantes e de aliviadoiros.
O obxectivo desta actuación integral no teito da instalación pretende dar unha solución definitiva ás filtracións localizadas nalgúns puntos das bancadas, especialmente en episodios de chuvia intensa.
