A Deputación xa dispón das parcelas para a construción dos centros de maiores de Folgoso do Courel, A Pobra do Brollón e Portomarín

O Executivo Provincial aprobou este venres na Xunta de Goberno a aceptación das parcelas para a construción de centros para maiores nos Concellos de Folgoso do Courel, A Pobra do Brollón e Portomarín, que poñen á disposición da Deputación os propios municipios. O Presidente, Darío Campos Conde, avanzou que “arestora, estamos tamén a solicitar as licencias municipais para iniciar, canto antes, as obras”.

Campos Conde explicou que “na Pobra do Brollón, construiremos unha residencia con 1,6 millóns de euros que poderá ofrecer atención profesional a 30 maiores. As obras, que están en proceso de contratación, poderán adxudicarse previsiblemente no vindeiro mes de maio. En Portomarín, construiremos 13 apartamentos tutelados, con capacidade para 54 maiores. As obras están en contratación e poderán adxudicarse no prazo de un mes e medio, contan cun investimento superior aos 1,7 millóns de euros”.

“E, finalmente, en Folgoso do Courel construiremos unha residencia e centro de día con capacidade para 52 usuarios. Arestora estanse a realizar os derradeiros trámites para poder aprobar o proxecto definitivo, e iniciar así a súa contratación”.

Pobra do Brollón
A parcela que pon a disposición o concello da Pobra do Brollón conta con 7.035 metros cadrados e está situada ao carón da Avenida Outeiro, e ao carón do centro de día municipal. O novo inmoble, duns 1.700 metros cadrados, contará con 2 plantas:

- o semisoto, de 277 metros cadrados, acollerá o almacén, lavandería, vestiario e locais técnicos;

- na planta baixa, de 1.531 metros cadrados, situaranse a área residencial, a zona de convivencia, o comedor e cociña, a área de atención especializada e os espazos de dirección e administración.

A área residencial, con zona dedicada exclusivamente a dormitorio, ocupa toda a parte frontal do edificio e disporá de 18 cuartos, con baño adaptado.  O centro tamén contará con despacho médico, sala de curas, 2 habitacións de enfermería e un baño asistido.

Portomarín
A parcela cedida polo concello de Portomarín conta cunha extensión de 800 metros cadrados e está situada fronte á Rúa Lugo, e preto da casa do Concello. Nela, construirase un edificio de 2.200 m2 e 4 plantas: o soto para o garaxe; planta baixa para o centro de día con capacidade para 28 maiores, 1 apartamento, comedor social e servizos comúns (lavandería, zona de vixilancia, control, administración...); A 1ª planta con 8 apartamentos e 2ª con 4 apartamentos. Os 13 apartamentos contan cunha superficie de entre 55 e 63 m2. Dispoñen de zona de cociña, comedor e sala de estar, habitación dobre e baño adaptado.

Folgoso do Courel
A finca na que se construirá esta dotación social en Folgoso do Courel é de 7.000 metros cadrados e esta situada á carón da rúa do colexio. Conta cun edificio de 780 metros cadrados, divido en 2 plantas. Na planta de acceso, situaranse 16 habitación dobres con capacidades para 32 maiores, unha área de recepción administrativa así como a enfermería, na que se inclúe un baño xeriátrico. 

No semisoto, situaranse as dependencias de uso común e diúrno, tales como a sala de actividades, a polivalente do centro de día e da residencia, así como o comedor. Tamén están situadas as áreas de control, lavandería, cociña, vestiario de persoas e cuarto de instalacións. 

As 16 habitacións proxectadas en total contan cunha superficie duns 24 metros cadrados cada un. Todos dispoñen dun baño adaptado.