Agra debateu sobre as relacións entre xustiza e igualdade no mundo contemporáneo, no marco dos Faladoiros Feministas
- Os encontros prolongaranse ata o mes de maio, coa participación das relatoras Marisa Soleto, no mes de abril, e Mercedes Expósito, en maio
- Estas charlas tratan de achegar á cidadanía ferramentas e recursos para fortalecer o empoderamento feminino e promover o coñecemento en cuestións de igualdade
O Auditorio do Centro Cultural Vello Cárcere acolleu este venres o faladoiro de María Xosé Agra, Son as mulleres vulnerables: pensando na xustiza e a igualdade, que organizan Deputación e Concello, da man do Foro Feminista Maruja Mallo. No acto, participou a Deputada de Benestar Social e Igualdade, Sonsoles López Izquierdo, quen destacou que esta iniciativa, de conexión do feminismo coa cidadanía, trata de propoñer alternativas para situacións derivadas da estrutura social patriarcal, erradicar os prexuízos que engaiolan ás mulleres, empoderalas e achegar o feminismo á sociedade como ferramenta de loita contra as violencias machistas.
Este relatorio está enmarcado dentro dos Faladoiros Feministas, orientado a crear espazos de estudo e reflexión sobre o rol das mulleres na sociedade actual. Durante a súa intervención, Agra subliñou que as mulleres son vulnerables, xa que se ben a vulnerabilidade é global e afecta á humanidade en xeral inflixindo medos, inseguridades e indefensión, este termo afecta sobre todo a grupos estruturais (segundo o sexo, clase, raza) sobre os que se constrúe unha distribución diferencial de poder.
A relatora explicou que vulnerabilidade significa dependencia, asimetría e distinción diferencial e destacou a necesidade de analizar se as mulleres son dependentes e de ser así, de que ou de quen; se se trata dunha vulnerabilidade social ou construída, social ou politicamente, entre outros factores que hai que ter en conta para determinar o grao de vulnerabilidade das mulleres na sociedade contemporánea.
Con estes faladoiros, búscase achegar ferramentas e recursos para fortalecer o empoderamento feminino, difundir o coñecemento en cuestións de igualdade, identificar as causas do estado actual e definir solucións, entre outros obxectivos.
Relatorios
O resto da programación dos Faladoiros Feministas que organizan Deputación e Concello contará cos seguintes relatorios:
- O 26 de abril, Marisa Soleto falará sobre A vida laboral das mulleres.
- O 24 de maio, cerrará a programación Mercedes Expósito, co seu relatorio A fábrica social da feminidade.
A entrada é libre e gratuíta ata completar aforo, 137 prazas.
