¿QUE É O QUE MÁIS CHE GUSTA?

As persoas usuarias e o persoal do CAM de Pol participaron nunha montaxe audiovisual no que respondían a esta pregunta:

 

O longo da reportaxe dámonos conta que o que máis nos gusta a todas e todos e facer cousas, sentirnos valoradas e valorados, acompañadas e acompañados, respectadas e respectados e sobre todo queridas e queridos. O vídeo realizouse para conmemorar o Día do Maior.

 

 

 

 

CREMOS QUE NOLO MERECEMOS. SOMOS MAIORES. VIVA A FESTA!

 

Para conmemorar o 1 de outubro Día do/a maior os sete centros da rede da Deputación de Lugo realizaron un mural cooperativo baixo o lema “Cremos que nolo merecemos. Somos Maiores. Viva a festa!”

O mural está composto por máis de 250 cubos que foron pintados polas persoas usuarias nas que aparecen as súas fotografías e actividades que se realizan nos centros. A lonxitude do mural é de 14 metros e 60 centímetros.

O mural expúxose o día 30 de setembro nun dos corredores principais no Pazo de San Marcos para conmemorar o día do maior. Nos vindeiros días colgarase na fachada do centro de atención a maiores de Meira.

 

 

 

O LAZO DO RECORDO

 

O 21 de setembro, día mundial do Alzhéimer, o CAM de Pol baixo o lema “O lazo do recordo maiores de Pol” realizou un gran lazo na fachada do seu centro no que as persoas usuarias e as persoas traballadoras expoñían as cousas que non querían esquecer.

 

                                                                            

Tamén realizaron un vídeo no que as persoas usuarias contan as cousas e persoas que non queren esquecer. Preme na ligazón para ver o vídeo:

 

 

EXPOSICIÓN A MEMORIA DO SON

 

As persoas usuarias do CAM da Fonsagrada acudiron a exposición “A Memoria do Son”. Esta mostra itinerante estivo no museo da Fonsagrada. Nela viron instrumentos do medievo que se fixeron no taller de instrumentos musicais do Centrad.

 

Sete instrumentos construídos a partir das iconografías do Pórtico da Gloria da Catedral de Santiago de Compostela, do Pazo de Xelmírez e das cantigas de Alfonso X.

 

Son os protagonistas da mostra: unha ziga, unha rota, unha cítola, unha zanfona, unha viola de perna, unha viola de brazo e un organistro.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Encontro en Trabada

 

O pasado 21 de maio de 2022 celebrouse un encontro de maiores no Concello de Trabada e varias persoas usuarias que conviven no CAM de Trabada non quixeron perdelo.

 

Ademais de reunirse cos seus veciños e coas súas veciñas, dito evento serviu para saír un pouco da rutina, degustar unha saborosa comida e gozar da música e do baile

 

Non faltaron agasallos para a muller e o home máis novo así como para a muller e o home máis vello, e un destes foi para Estebo.

 

De hoxe nun ano oxalá poidamos volver a celebralo e mentres tanto recordaremos este bonito día.

 

 

                                              

 

 

 

No CAM da Fonsagrada para celebrar o día das letras galegas realizouse unha actividade de lectura dos escritores e escritoras galegas ós/ás que se lles adicou as letras galegas. Fixeron lecturas de Rosalía de Castro, Manuel María, Xela Arias, Castelao....e Florencio Delgado Gurriarán.

 

 

Para realizar esas lecturas primeiro tiñan que resolver uns pequenos quebracabezas.

 

 

Con esta actividade fomentase o desenvolvemento das capacidades motrices, físicas, artísticas, plásticas, estéticas, creativas, emocionais, de relación, etc, entre as persoas usuarias.

 

 

DICÍMOLO NÓS

 

Con motivo do Día das Letras Galegas, fíxose un documento audiovisual en tódolos centros de atención a maiores da Deputación de Lugo facendo un recoñecemento de tódalas variedades dialectais que ten o noso marabilloso idioma, o galego, en Lugo.

 

Para facer este montaxe as persoas usuarias foron dicindo palabras propias de cada zona e fóronse comparando como se dicían nos outros centros da provincia. Esta actividade tivo moi boa aceptación entre as persoas usuarias xa que asómbralles como en tan poucos quilómetros a provincia de Lugo ten moita riqueza lingüística. Con esta actividade fomentase o respecto pola identidade lingüística lucense.

 

 

 

 

A VODA DO GALO PINTO

As persoas usuarias do CAM de Trabada prepararon con moito cariño e dedicación o conto da voda do galo pinto para a comunidade educativa do CEIP Plurilingüe Celso Currás en Trabada.

 

Na montaxe audiovisual participaron 11 persoas usuarias. O conto narra un triángulo amoroso con celos, penas, enganos e cobiza. Con estes ingredientes a emoción está garantida.

A pasada semana levaron o documento audiovisual ó colexio tres usuarias do CAM de Trabada. Foron recibidas por toda a cativada e o profesorado e viron todos xuntos e xuntas o conto. Tras escoitalo, falaron de como era a escola cando elas estudaron e cal eran os métodos educativos utilizados antes polos profesores e profesoras.

Con esta actividade promóvese as situacións culturais e o intercambio de experiencias entre as distintas xeracións da localidade de Trabada.

 

Se queres escoitar o conto, preme nesta foto:

 

 

 

 

 

 

 

 

 

       

 

APEIROS DE LABRANZA

 

Os apeiros de labranza foron e son ferramentas indispensables para calquera labrego ou labrega que se preste, e na maioría das persoas que conviven nos centros teñen coñecementos inmensos acerca delas: como se chaman, algo que varía en función da zona de Lugo, para que serven, de que están feitos... e en xeral, coñecen tódalas tarefas e traballos do campo que se facían con eles.

 

A actividade dos apeiros de labranza desenvolveuse nos CAM de Pol, A Fonsagrada e Castroverde. Falamos sobre as máis habituais, sendo moi revelador a cantidade de nomes para referirse a unha mesma ferramenta segundo o lugar e as características.

 

 

 

APEIRO	UTILIDADE	CAM POL	CAM CASTROVERDE	CAM A FONSAGRADA
SACHO	Sachar, facer os regos, quitar terra e botala por riba, para facer presas nos prados, para limpar un camín,...	Sacho, rodo (plano na parte superior)	Sacho, rodo (plano na parte superior)	Sacho, roda/rodo (plano na parte superior), chapo (con punta na parte superior)
FORQUITA	Recoller/cargar/extender herba, toxos, esterco,...	Colmeira, gallita, forquita	Galleta, gallita, galla, horquillo, horquilla, forquita, forcada	Forquita, forqueta, horca, galla
FOUCE	Cortar os nabos, rozar as silveiras, toxos e xestas, apañar o calexo, trigo, centeo, segar o cereal ou o pan	Fouciña (é máis grande), fouciño	Fouciño, gateño.	Fouce, foucín, podón.
MACHETA	Partir ou fender a leña, cortar/esboucar/repolar as canas dunha árbore, facer e labrar paos ou madeiros.	Macheta, brosa, machada	Macheta, machado, brosa	Brosa, hacha
GADAÑA	Gadañar/segar/cortar a herba.	Gadaña	Gadaña	Gadaña
ANGAZO	Angazar/enciñar/xuntar a herba, ou a malla na aira, apañar a folla na carballeira.	Angazo, rastrillo (é de ferro)	Angazo, enciño, rastrillo (é de ferro)	Angazo, rastrillo (é de ferro)
ARADO	Arar/sucar a terra, abrir os regos nas leiras.	Arado	Arado de pau	Arado de pao
GRADE	Gradar/preparar/allanar a terra	Grade	Grade	Grade
PENEIRA	Limpar/quitarlle o pó ó grao	Peneira, criba, burtel	Peneira, cribo, criba.	Pineira, cribo, limpiadora.
FERRADO/TEGO	Medir o cereal, trigo, centeo, cebada.	Ferrado. 4 ferrados=1 fanega de terreo (50 Kg). O tego é máis pequeño.	Ferrado. 1 ferrado rapado=14 Kg 4 ferrados=1 fanega de terreo. O tego é a metade o ferrado.	Tego (é a medida oficial na Fonsagrada) 1 tego rapado = 6 Kg. 2 tegos=1 ferrado
PALA	Facer furados na terra, coller/levar terra/area/carbón, cavar.	Pala	Pala	Pala
CESTO	Levar calqueira cousa: froita, patacas, verdura,...	Cesto	Cesto, canasto, talego.	Cesta
CARRO	Cargar e levar todo o que se precisara: esterco, herba, leña, toxos, patacas, etc.	Carro	Carro	Carro

 

 

PASEN VOSTEDES....

 

A semana pasada o CAM de Meira converteuse nun estudio de gravación improvisado. As persoas usuarias ensináronnos as estancias do seu fogar ao estilo dun programa televisivo no que a xente ensinaba os seus fogares.Este documento audiovisual utilizouse para ensinarlle á comunidade educativa do IES Pedregal de Irimia de Meira as instalacións sendo os e as guías as propias persoas usuarias. A estrea deste vídeo levouse a cabo o xoves 5 de maio no CAM de Meira. Os e as protagonistas sentíronse moi orgullosos/as do traballo realizado. Emociónalles que os compañeiros e compañeiras doutros centros e os seus familiares poidan ver o traballo realizado.

 

 

 

 

 

 

 

En Sen Pelos na Lingua seis mulleres e dous homes do CAM de Pedrafita do Cebreiro contestan de maneira espontánea preguntas sobre as mulleres de antes e as de ágora.

• ¿Algunha vez tiveches que facer algo que non querías por ser muller?

• ¿pode un home criar a súa familia igual que unha muller?

• ¿que opinas de que unha muller non teña fillos?

• ¿Se volveras nacer que che gustaría ser home ou muller?

Este documento audiovisual foi feito con motivo do 8 de Marzo, Día da Muller. Será proxectado en tódolos centros para que o resto de compañeiras e compañeiros podan tamén opinar, falar e reflexionar sobre as preguntas formuladas.
Outra vez máis estas expertas e expertos falan sen medo e sen pelos da lingua dos temas de antes, de ágora e de sempre.

 

 

 

 

 

 

Uns ovos, fariña, manteiga e un pouco anís son suficientes para poder facer unha deliciosa sobremesa de Entroido.

No CAM de Pedrafita animáronse a facer as orellas de Entroido. Amasaron, fritiron e sobre todo gozaron do seu sabor.