Deputación de Lugo
Medio ambiente

A dixitalización do sector agrario centra o novo ciclo de conferencias Luis Asorey, co que colabora a Deputación

ciclo luis asorey
real academia de ciencias
O Deputado de Participación Cidadá inaugurou unha nova edición das conferencias organizadas pola Real Academia Galega de Ciencias, que se celebrarán ata o día 24 de novembro

García Pernas destacou que favorecer a innovación do tecido produtivo é unha das liñas de traballo da institución provincial con proxectos como a Granxa Experimental de Leite e con iniciativas como o plan Reiníciate: Dixitaliza a túa empresa, co que ofrece formación e asesoramento gratuítos a pemes e autónomos en materia de dixitalización

O Deputado de Participación Cidadá, Roberto García Pernas, inaugurou este luns o ciclo de conferencias Luís Asorey 2021 que organiza a Real Academia Galega de Ciencias (RAGC) coa colaboración da Deputación. Este ano, as xornadas céntranse na dixitalización do sector agrario e desenvolveranse en formato mixto -de xeito presencial no Salón de Actos da Deputación de Lugo e telemático a través da canle de Youtube da RAGC-  ata o vindeiro día 24 de novembro.

García Pernas enmarcou o apoio da institución provincial ao ciclo “dentro da nosa aposta para que a inmensa riqueza medioambiental coa que contamos na provincia de Lugo sexa unha oportunidade de desenvolvemento sostible, tanto a nivel social como a nivel económico”. 

O Deputado enxalzou á organización pola temática das xornadas, porque “na Deputación estamos convencidos de que dous  factores esenciais para que as explotacións agrogandeiras sexan máis competitivas e sostibles, e para que gañen produtividade, son a innovación a través da transferencia de coñecementos xerados pola Universidade, e a incorporación e o uso eficiente das novas tecnoloxías”. De feito, engadiu, “esta é unha das nosas liñas de traballo dentro dos proxectos de colaboración que temos co tecido produtivo”.

En concreto, o Deputado destacou, con respecto ó sector agrario, a Granxa Experimental de Leite que a Deputación puxo en marcha hai case un ano en colaboración coa Universidade de Santiago de Compostela nas instalacións da Granxa Gayoso Castro, en Castro Ribeiras de Lea, “o primeiro centro público de toda Galicia que aúna actividades de formación universitaria e de investigación en torno ó sector lácteo”. A Granxa de Leite, detallou, “está dedicada á docencia, pero tamén a poñer ó servizo do sector a investigación e a innovación, aproveitando o caudal de coñecemento que crea a Universidade”.

Así mesmo, Roberto García Pernas destacou que a Deputación ten en marcha “un programa de formación e asesoramento gratuíto, que vai precisamente na liña de axudar ás pequenas e medianas e empresas, e ós autónomos, a aproveitar as oportunidades que ofrecen as novas tecnoloxías para modernizar e para mellorar o seu negocio”. Trátase do programa Reiníciate: Dixitaliza a túa empresa, no que a día de hoxe están xa apuntadas 100 empresas.

Hoxe celebrouse a conferencia inaugural a cargo do xerente de proxectos da área de Solucións Tecnolóxicas Sectoriais de AMTEGA, Manuel Barcón Goás, que se centrou no Contexto europeo, español e galego sobre a dixitalización e robótica.

 

Programación

Martes, 16 de novembro – 19:00 horas
O Doutor Enxeñeiro Agrónomo e profesor da Escola Politécnica Superior de Enxeñaría de Lugo, Javier Bueno Lema falará da Mecanización e dixitalización do sector agroalimentario. 

Mércores, 18 de novembro – 19:00 horas
A dixitalización na rodución de leite, será a cargo do doutor en Veterinaria, Ramiro Antonio Fouz Dopacio.

Xoves, 18 de novembro – 19.00 horas
O Exeñeiro de Montes e Director Xeral de Planificación e Ordenación Forestal porá sobre a mesa a Dixitalización e descarbonización da xestión forestal en Galicia.

Luns, 22 de novembro – 19.00 horas
O Enxeñeiro de Telecomunicacións e responsable de I+D da División de Sensórica e de Sistemas Aéreos non Tripulados, Jorge Seoane Brandariz, falará de Drons aplicados á xestión agroforestal.

Martes, 23 de novembro – 19.00 horas
Celebrarase unha mesa redonda na que se abordarán as Aplicacións para propietarios, industria e comercialización. Catro casos de éxito en Galicia, moderada por Antonio Rigueiro. Nela participarán o xerente da empresa fmC Forestal y Medioambiente Consultores, Jesús Martínez Ben, que falará de Trazabilidade no sector forestal: Chainwood e Timbertrack; a directora Xeral da empresa Monet Tecnoloxía e Innovación Viticultura, Débora Franco Vázquez, que analizará o Apoio á toma de decisións en viticultura; e a enxeñeira de Montes Mercedes Rois Díaz que abordará a temática das Aplicacións na cadea de valor forestal europea: Smartwood para selección de especies.  

Mércores, 24 de novembro– 19.00 horas
A doutora enxeñeira Agrónoma e directora Xeral de Desenvolvemento Rural e da Axencia Galega de Desenvolvemento Rural (AGADER) da Consellería do Medio Rural da Xunta de Galicia, Inés Santé Riveira, impartirá unha conferencia sobre Estratexias de dixitalización para o territorio rural galego.