O Presidente lidera unha misión institucional e empresarial ao Uruguai e á Arxentina para reforzar lazos, abrir mercados e proxectar a provincia no exterior
O Presidente da Deputación de Lugo, José Tomé Roca, encabeza a vindeira semana unha misión institucional e empresarial de alto nivel ao Uruguai e á Arxentina, organizada en colaboración coa Confederación de Empresarios de Lugo (CEL). A iniciativa combina diplomacia institucional e impulso económico, e ten como finalidade reforzar os vínculos coa comunidade galega na rexión do Río da Prata, abrir novas canles de cooperación internacional e impulsar a presenza das empresas lucenses en mercados estratéxicos. Durante unha semana, o mandatario provincial e a delegación lucense desenvolverán unha intensa axenda de encontros oficiais, empresariais e culturais, que reflicte o carácter estratéxico e a proxección exterior desta viaxe.
En Montevideo, o Presidente manterá reunións coa Embaixada de España, con varios Ministerios, coa Cámara de Industrias do Uruguai, co Instituto Nacional de Loxística e co organismo público Uruguai XXI, responsable da promoción de investimentos e exportacións. A misión tamén inclúe encontros con entidades industriais, onde se abordarán oportunidades de colaboración en innovación e dixitalización vinculadas ao sector agroalimentario, un dos eidos de maior potencial na provincia. Posteriormente, a delegación desprazarase a Bos Aires, onde está previsto un programa institucional centrado na colectividade galega e na cooperación cultural e económica.
A Deputación de Lugo e a CEL impulsan esta misión coa vontade de proxectar a provincia nun contexto global, favorecendo a internacionalización do tecido produtivo lucense e posicionando Lugo como un territorio moderno, competitivo e innovador. Tomé Roca subliña que “esta misión é unha acción estratéxica que combina diplomacia institucional e impulso económico. Imos abrir portas, establecer contactos e reforzar a presenza da provincia de Lugo nun espazo internacional onde se decide parte do noso futuro”. Engadiu que “temos empresas con talento e capacidade, e desde a Deputación imos acompañalas e darlles apoio institucional para que poidan crecer, innovar e internacionalizarse”.
O Presidente destacou tamén a importancia da colaboración público-privada, asegurando que “cando administracións e empresas traballan da man, os resultados multiplícanse. A Deputación pon a súa capacidade diplomática e institucional ao servizo das pemes lucenses, para xerar oportunidades reais e consolidar un desenvolvemento sostido”.
O Uruguai e a Arxentina foron escollidos como destinos desta misión pola súa estabilidade institucional, o seu peso no Mercosur e a profunda pegada da emigración galega. Para o Tomé Roca, “Galicia e América Latina comparten lingua, valores e historia; agora queremos transformar esa irmandade en oportunidades económicas e culturais de ida e volta”. Esta misión, sinalou, “reflicte a vocación internacional dunha provincia que aposta por tender pontes e fortalecer as relacións coas comunidades galegas do exterior, ao tempo que promove o talento e a innovación das súas empresas no mundo”.
Con esta viaxe, a Deputación de Lugo reafirma o seu compromiso cun modelo de provincia aberta, dinámica e conectada co exterior, e coa internacionalización como eixo de crecemento e progreso. A través da cooperación coa Confederación de Empresarios de Lugo, a Deputación consolida o seu papel de facilitadora institucional, acompañando ás empresas e reforzando a imaxe de Lugo como territorio con vocación de futuro, orgullo das súas raíces e ambición global.
