A Deputación divulga os valores da Reserva Terras do Miño cunha actividade de educación ambiental sobre os morcegos
A Casa das Insuas de Rábade acolleu este sábado a actividade de educación ambiental Morcegos en Familia, organizada no marco do labor de conservación, divulgación e xestión dos espazos naturais das Insuas do Miño e Ollos de Begonte que a Deputación ten encomendado á Asociación Galega de Custodia do Territorio.
Nesta actividade de estudio da natureza e sensibilización sobre os valores naturais da Reserva da Biosfera Terras do Miño participaron 10 persoas, que percorreron as Insuas do Miño e coñeceron a importancia das especies da fauna e flora deste entorno. Tamén tiveron a oportunidade de observar especies de morcegos nalgunhas das caixas que ten instaladas no territorio a Asociación Drosera, unha entidade medioambiental que colaborou nesta charla de sensibilización sobre a conservación da biodiversidade de Terras do Miño. A actividade realizouse respectando en todo momento a normativa e recomendacións vixentes para previr o contaxio daCovid.
Custodia do Territorio
A Deputación de Lugo vén de seleccionar a través dun procedemento de concorrencia competitiva á Asociación Galega de Custodia do Territorio para a conservación, divulgación e xestión das Insuas do Miño e Ollos de Begonte, un territorio de 112 hectáreas de titularidade da institución provincial, que alberga zonas de grande interese ambiental. A institución provincial achega 25.000€ ao ano por este contrato, que ten unha duración de catro anos.
Este acordo ten como finalidade cumprir co obxectivo de conservación do patrimonio natural e a biodiversidade, incluído no Plan de Acción da Reserva da Biosfera Terras do Miño da Deputación de Lugo, e que comprende accións de conservación dos hábitats naturais, de especies de interese e dos agrosistemas tradicionais, así como a adaptación ou mitigación do cambio climático e o control de especies invasoras.
