Cortada a estrada provincial no pobo de Belesar polo desprendemento de parte da calzada debido ás intensas choivas
Os vehículos que transiten por esta estrada poderán desviarse pola ponte de Belesar ou tomar a estrada LU-533
A estrada provincial de Belesar a Chantada por San Pedro de Líncora, a LU-P-1804, foi cortada este xoves á altura do punto quilométrico 6, no pobo de Belesar, enfronte do embarcadoiro da Deputación, para garantir a seguridade dos vehículos logo de producirse un desprendemento de terra e o afundimento de parte da calzada debido ás intensas e continuadas choivas producidas entre onte e hoxe.
Os vehículos que transiten por esta estrada poderán desviarse pola ponte de Belesar ou tomar a estrada LU-533. Operativos do servizo de Xestión Territorial da Deputación colocaron nestes dous cruces avisos de advertencia do corte da estrada.
O Presidente da Deputación, José Tomé Roca, que dirixe a área de Xestión Territorial, informa de que os técnicos realizarán unha valoración económica nos vindeiros días dos danos ocasionados por este desprendemento de terra causado polas choivas. Subliña que a institución traballará coa maior celeridade posible para reabrir de novo esta estrada ao tráfico.
