A Deputación inicia en Sober as obras de mellora da estrada provincial que une Canabal con Arxemil
Os traballos desenvólvense entre os puntos quilométricos 3,5 e 4,5 co obxectivo de reforzar a seguridade viaria e a comodidade dos usuarios e usuarias
O Presidente da Deputación de Lugo, José Tomé Roca, responsable directo da área de Xestión Territorial, informa de que se acaban de iniciar esta semana en Sober os traballos de mellora da estrada provincial LU-P-5902, que une o núcleo de Canabal con Rosende e Arxemil. Nestas actuacións a institución provincial inviste máis de 61.000€.
Os traballos desenvólvense entre os punto quilométricos 3,5 e 4,5 e consisten na limpeza de cunetas, drenaxe, pavimentación con aglomerado en quente e a correspondente sinalización horizontal.
Tomé Roca subliña que con estas actuacións que comezaron hoxe en Sober, a Deputación continúa a mellorar a rede viaria provincial, favorecendo deste xeito a seguridade, o equilibrio territorial e a calidade de vida dos veciños e veciñas da provincia de Lugo.
