A Deputación impulsa con 25.000 euros o Festival 17º Ribeira Sacra
“Está na nosa man dende as administracións públicas, traballar de maneira conxunta para reactivar o sector turístico como fonte de riqueza para o territorio”, subliñou a Deputada de Turismo, Pilar García Porto
A Deputada de Réxime Interior, Promoción do Territorio e Turismo, Pilar García Porto, avanzou este mércores que a cuarta edición do Festival 17º Ribeira Sacra terá lugar esta fin de semana, entre o venres e o domingo, en diferentes escenarios da zona sur da provincia. A Deputación colabora con este evento musical cunha achega de 25.000 euros.
Nesta ocasión e seguindo coas recomendacións das autoridades sanitarias a causa da Covid-19, o Festival conta cun protocolo xeral de prevención e actuación elaborado por un equipo de profesionais. Co fin de garantir a seguridade de todos os asistentes establécese: o uso da máscara, hixiene de mans, carrís de circulación, distancias de seguridade, e limpeza de baños e espazos comúns.
García Porto destacou que o Festival 17º Ribeira Sacra “é un referente no panorama musical galego porque trae á nosa provincia artistas de renome que conforman un cartel único, de excelencia e calidade”. Nesta liña, a Deputada recalcou o compromiso da Deputación con citas coma esta que supoñen un efecto dinamizador da economía para toda a comarca da Ribeira Sacra e en consecuencia do conxunto da provincia.
“Coa crise sanitaria todos os sectores económicos se viron tremendamente afectados. Está na nosa man dende as administracións públicas, traballar de maneira conxunta para reimpulsar o eido turístico como fonte de riqueza para o territorio”, sinalou Pilar García Porto.
Como nas pasadas edicións, o Festival ofrécelle ao público unha experiencia única combinando música e actividades en escenarios emblemáticos e enclaves naturais da contorna da Ribeira Sacra.
Programación
Venres, 31 de xullo
- Ás 16:00 horas: apertura e punto de acreditación na bodega Regina Viarum.
- Ás 18:00 horas: concerto sorpresa no catamarán de Ponte do Sil.
- Ás 21:00 horas: actuación de Cassete Pirata e Ele no escenario Fest Galicia situado na bodega Regina Viarum.
Sábado, 1 de agosto:
- Ás 12:00 horas: concerto de Momboi no Eurostars do Pazo de Sober.
- Ás 14:00 horas: actuación de Laura Lamontagne e Pico Amperio na bodega Regina Viarum.
- Ás 17:00 horas: concerto da artista Elba e Best Boy, no escenario Momentos Alhambra situado no Mirador de Santiorxo.
- Ás 21:00 horas: actuarán Os amigos dos músicos e Xoel López na bodega Regina Viarum.
Domingo, 2 de agosto:
- Ás 13:30 horas: concerto de Guadi Galego no escenario Momentos Alhambra situado nesta ocasión, na Praza de España de Chantada.