A Deputación colabora coas actividades de Expomar cunha achega de 10.000 euros
José Tomé sinalou que Expomar “xoga un papel moi importante para o dinamismo da economía lucense e supón un escaparate turístico de primeira orde para dar a coñecer a riqueza de recursos da provincia”
Continuando coa rolda de reunións con colectivos da provincia, Tomé tamén se reuniu hoxe co presidente da Federación Provincial de Confrarías de Pescadores
O Presidente da Deputación, José Tomé, mantivo este xoves un encontro co Presidente da Fundación Expomar e Alcalde en funcións de Burela, Alfredo Llano, no que se asinou o convenio que regula a subvención nominativa de 10.000 euros que o organismo provincial lle concede á entidade para o financiamento das súas actividades.
José Tomé sinalou que Expomar “xoga un papel moi importante para o dinamismo da economía mariñana e do conxunto de Lugo, e supón un escaparate turístico de primeira orde para dar a coñecer a riqueza de recursos da provincia”.
A Fundación Expomar realiza dúas actividades principais, a Feira Produart de produtos artesanais e ecolóxicos e a Feira bianual Expomar, un espazo de encontro e comunicación entre administracións, empresarios e traballadores do mundo do mar. Así mesmo, Expomar organiza outras dúas citas, anteriormente vinculadas á Feira bianual, pero que pola súa relevancia adquiriron entidade propia e que se celebran cada ano na vila mariñá: o Encontro Empresarial e as Xornadas Técnicas onde se tratan temas de actualidade con relatores de primeiro nivel.
Federación de Confrarías de pescadores
Continuando coa rolda de entrevistas con colectivos sociais que vén mantendo dende a conformación do Goberno provincial, José Tomé tamén se reuniu esta mañá co Presidente da Federación Provincial de Confrarías de Pescadores, José Basilio Otero Rodríguez.
O Presidente e Otero Rodríguez coincidiron na necesidade de crear conciencia en torno á importancia do sector pesqueiro para o desenvolvemento da provincia, e sensibilización ante os novos retos que se lle presentan.
