As mulleres de Insua e o Liño recupera a etnografía da provincia co apoio da Deputación
Vidal Baamonde subliñou que “esta publicación contribúe á recuperación da historia e etnografía da nosa provincia xa que reflicte antigas tradicións comunitarias do rural xa desaparecidas entorno á cultura do liño para que permanezan na nosa memoria”
Con esta publicación, a autora e historiadora vilalbesa rende homenaxe tamén á Asociación de Mulleres de Insua da que forma parte e que leva dez anos recuperando este patrimonio etnográfico entorno á cultura do liño.
O Deputado de Turismo, Eduardo Vidal Baamonde, participou na presentación do libro As mulleres de Insua e o Liño: dez anos dun proxecto de recuperación etnográfica editado polo Instituto de Estudos Chairegos de Vilalba IESCHA coa colaboración da Deputación. Esta primeira edición publicará un total de 500 exemplares. No acto, que tivo lugar na Casa da Cultura de Vilalba, estivo acompañado da autora, a vilalbesa e historiadora, Miriam Fernández Otero, da Presidenta do IESCHA, Marisa Barreiro Mejuto, e dos colaboradores do libro, Xosé Felpeto Enriquez, e Mario Outeiro.
A autora documenta a cultura tradicional do proceso de cultivo do liño, unha antiga tradición galega de traballo comunitario rural xa desaparecida. A súa riqueza lingüística reflíctese na recompilación de refráns, cancioneiros populares e no vocabulario sobre este antigo traballo téxtil. A obra tamén repasa a través de fotografías os dez anos da Asociación de Mulleres de Insua, da que forma parte a autora, que realiza un traballo de recuperación do patrimonio etnográfico e difusión das labores asociadas á transformación do liño. Tamén inclúe recortes de prensa do seu tradicional evento da ‘Tasca do Liño’.
Vidal Baamonde subliñou que “O Goberno da Deputación decidiu sumarse a esta iniciativa porque contribúe á recuperación da historia e etnografía da nosa provincia. Esta obra reflicte os tradicionais traballos artesanais e téxtiles que xiran ao redor da cultura do liño para que permanezan na nosa memoria os antigas tradicións comunitarias do rural xa desaparecidas”
Sobre a autora do libro
Miriam Fernández Otero é unha historiadora vilalbesa que naceu na parroquia de San Bartolomeu de Insua no 1990. O seu interese pola historia e o patrimonio, levouna a cursas Historia da Arte e a especializarse en Servizos Culturais e Xestión do Patrimonio cultural.
É integrante da Asociación de Mulleres Rurais de San Bartolomeu de Insua dende os seus comezos en 2007, desenvolveu un intenso traballo de investigación para a recuperación do cultivo tradicional do liño e toda a cultura xerada ó seu arredor, participando ademais coma poñente na mesa redonda da Tasca do Liño (2015-2016) mediante disertacións sobre a historia do tecido e a muller e o téxtil.
