Máis de 300 parellas participarán no XXII Máster Futbolín de Rábade, co que colabora a Deputación
Rivera Capón subliñou que “é unha cita xa consolidada na comarca, á que ano tras ano se achegan máis participantes e veciños para desfrutar dun evento único na provincia”
O Deputado de Deportes, Pablo Rivera Capón, xunto ao Tenente de Alcalde do Concello de Rábade, Ángel Manuel Lage García, o Concelleiro de Deportes, Alejandro Martínez Campos, e o Presidente da Asociación de Futbolín Bola Meiga, José Manuel Candal Barreiro, presentaron este mércores, no Pavillón do IES Río Miño, o XXII Máster Nacional de Futbolín, que terá lugar mañá xoves, o venres e o sábado, coa colaboración do Executivo Provincial.
Rivera Capón sinalou que “o Máster de Futbolín de Rábade é unha cita xa consolidada na comarca, á que ano tras ano se achegan máis participantes e veciños para desfrutar dun evento único na provincia. Ata o día de hoxe, hai inscritas máis de 300 parellas, que participarán entre as cinco modalidades do torneo, polo que, de seguro esta vixésimo segunda edición será un gran éxito”.
Como en anteriores anos, haberá cinco modalidades de xogo e tres niveis, onde se repartirán 10.000 euros en becas deportivas. Ademais, haberá premios para todas as modalidades e camisetas de recordo para os participantes.
Programa do Máster de Futbolín
Xoves, 18 de abril:
- 16:00 horas: Comezo do máster (Modalidade infantil 2002-2019)
- 17:o0 horas: Sorteo de parellas cegas
- 18:30 horas: Modalidade ‘Combinada parellas cegas’
Venres, 19 de abril:
- 12:00 horas: Modalidade ‘En parado’
- 12:00: horas: Modalidade ‘Feminina’
Sábado, 20 de abril:
- 11:00 horas: Modalidade ‘En movemento’
- 21:00 horas: Finais
- 23:00 horas: Entrega de premios e clausura
