Deputación e Concello de Cervantes acordan construír un centro de maiores público no municipio
Trátase do primeiro documento co que se inician os trámites para a construción do centro. De seguido, dende a Deputación redactarase o proxecto e o Concello deberá facer unha achega de 200.000 euros, ceder os terreos e conceder as licencias
Previsiblemente, o centro poderá ofrecer 50 prazas, 30 de residencia e 20 de centro de día, garantindo o acceso aos veciños do Concello e da zona, con independencia da súa capacidade económica
O Presidente da Deputación, Darío Campos Conde, e o Alcalde de Cervantes, Benigno Gómez Tadín, asinaron o protocolo xeral entre ambas institucións para construír un centro para maiores público en dito municipio da montaña lucense. Trátase do primeiro documento co que se inician os trámites para dotar a Cervantes dunha infraestrutura pública de atención aos maiores.
A través deste protocolo que veñen de asinar, Deputación e Concello de Cervantes acordan comezar cos procedementos xurídicos e administrativos necesarios para construír no municipio un centro de maiores que ofreza atención profesional aos veciños da zona, co fin de ter listo canto antes o convenio de colaboración. Ademais, o Concello comprométese a facer unha achega de 200.000 euros, ceder os terreos e conceder as licencias necesarias para poder executar estes traballos, tal e como fixeron o resto de municipios que contan cunha dotación social destas características.
De seguido, dende a Deputación iniciarase a redacción do proxecto para poñer á disposición dos veciños un centro de día e residencia público, co fin de ofrecerlles un servizo moi necesario pois, en Cervantes, máis do 40% da poboación supera os 65 anos. Logo da redacción do proxecto, e cando o Concello poña á disposición da Deputación os terreos, poderase licitar a obra.
O proxecto continuará co modelo de residencias da Deputación, ofrecendo, en principio, un total de 50 prazas, 30 de residencia e 20 de centro de día. Por outra banda, Deputación e Concello buscan implantar o modelo de acceso aplicado nos centros de Pol, Trabada, Fonsagrada ou Ribadeo. Para elo, aprobaranse os convenios que garanten a xestión pública dos centros dende a Deputación, que as prazas sexan de xeito preferente para os veciños do Concello, en segundo termo para os da bisbarra, e por último para lucenses en xeral.
Tamén se garante que todos os veciños poidan acceder ás prazas das residencias e centros públicos da Deputación nos Concellos, independentemente da súa capacidade económica.