Deputación e Concello realizan melloras no complexo deportivo de Monterroso, que empregan máis de 250 veciños
Con estas actuacións, as escolas deportivas, que contan con especialidades como pádel, karate, crossfit/fitness e patinaxe e os equipos de fútbol sala presentes no municipio poderán unificar toda a actividade deportiva nun mesmo lugar
O Presidente, Darío Campos Conde, e o Alcalde de Monterroso, Miguel Rico, acordaron este luns financiar melloras no complexo deportivo do municipio, que empregan máis de 250 veciños da zona. Este acordo contempla a achega de 200.000 euros da Deputación e 8.200 do Concello.
Así o explicaron o Presidente e o Rexedor municipal no acto no que deron a coñecer máis polo miúdo as actuacións que se van a realizar, e no que participaron veciños e representantes das entidades deportivas que empregan acotío estas instalacións.
As actuacións consistirán na mellora da instalación eléctrica; a dotación de vestiarios debaixo das gradas do pavillón, xa que ata o momento o complexo só contaba cos vestiarios da piscina; e a renovación da entrada ao complexo, coa instalación de taquillas para os usuarios e un espazo de recepción.
Ata o momento, as escolas deportivas municipais organizaban algunhas das súas actividades no espazo multiusos, pero grazas a esta obra poderán unificar toda a actividade deportiva nun mesmo lugar.
Así os preto de 250 veciños, entre nenos e adultos, que participan nas escolas deportivas de pádel, karate, crossfit/fitness e patinaxe; así como os xogadores dos dous equipos de fútbol sala presentes no municipio, terán un lugar común de referencia para a práctica deportiva.
