25 persoas participan no obradoiro gratuíto da Deputación sobre educación cívica medioambiental, no paseo do Rato
- Este obradoiro enmárcase na programación de actividades medioambientais do Executivo Provincial para o primeiro trimestre do ano
- O curso ten unha duración de 8 horas, que corren a cargo dos membros do grupo de investigación da USC Edunartex (Educación, Natureza, Arte e Excursionismo)
25 persoas participarán, este venres e o sábado 16 de marzo, no obradoiro gratuíto Descubrindo a arte na natureza, que ofrece o Goberno da Deputación no Centro de Interpretación Terras do Miño, enmarcado na programación de actividades medioambientais do Executivo Provincial para o primeiro trimestre do ano. A actividade, pensada para desfrutar en familia, ten como finalidade ofrecer información sobre a importancia do comportamento cívico na natureza e concienciar sobre os problemas ambientais e achegar aos asistentes á flora e fauna autóctonas, co fin de contribuír con estas a unha educación ambiental.
Como vén sendo habitual, estes cursos, ademais de ser formativos para a poboación, teñen unha clara finalidade: espallar entre a cidadanía unha cultura ambiental de coidado e conservación do medio ambiente. A través destes obradoiros, a Deputación ofrece formación totalmente de balde e ademais contribúe a que os participantes adquiran unha conexión coa natureza, unha mellor comprensión e unha responsabilidade co medio rural.
O grupo de Investigación Edunartex
O obradoiro terá unha duración de 8 horas nas que membros do grupo de investigación da USC Edunartex (Educación, Natureza, Arte e Excursionismo) darán aos participantes nocións básicas teóricas e prácticas ao aire libre sobre a importancia dos conceptos de biodiversidade e sustentabilidade.
Durante o curso, os participantes recibirán formación sobre os recursos da terra, particularmente do chan, a auga, os minerais, así como as súas características e o rol que desempeñan como apoio dos organismos vivos; a dependencia dos seres humanos dos recursos ambientais para a vida e a sustentabilidade; as características das sociedades e o seu impacto na contorna natural; os procesos de urbanización e as consecuencias de desruralización, entre outros temas relacionados.
Obxectivos da educación ambiental
O obxectivo é que os asistentes adquiran unha educación ambiental que lles permita aplicar conceptos fundamentais como contorna, comunidade, desenvolvemento, biodiversidade ou sustentabilidade a contextos locais, nacionais e globais; ter un amplo abano de recursos á hora de abordar cuestións medioambientais.
A educación ambiental incorpora unha perspectiva comprometida coa natureza á hora de tomar decisións. Os participantes aprenderán a apreciar a fraxilidade e a beleza da natureza e a desenvolver o respecto pola contorna e as funcións de todos os seres vivos que conforman o ecosistema global; a entender que a vida humana depende dos recursos do planeta e a necesidade dun progreso sustentable para garantir a existencia deses recursos.
Programación totalmente de balde
Cada ano, centos de persoas participan de xeito totalmente gratuíto nesta programación de actividades medioambientais que ofrece a Deputación. De feito, o ano pasado, foron máis de 4.000 os veciños da provincia que se sumaron a estas actividades. A través deste tipo de iniciativas, o Goberno busca fomentar entre a cidadanía valores relacionados coa conservación e mantemento do medio ambiente e, ao mesmo tempo, dar a coñecer o entorno natural da provincia, co fin de aprender a respectalo e coidalo.