Aprobada en Xunta de Goberno a Copa Deputación de Fútbol Sala, cun investimento de 17.000 euros da Área de Deportes
A Vicepresidenta da Deputación, Maite Ferreiro, subliñou a participación feminina na competición, na que se premiará coas mesmas cantidades a campioas e campións
Lugo, 20 de setembro.- A Xunta de Goberno aprobou a segunda edición da Copa Deputación de Fútbol Sala, unha competición en marcha que convoca 27 equipos da provincia: 9 femininos e 18 masculinos de distintas categorías senior.
A Área de Deportes inviste na organización da competición 17.000 euros, que se distribúen entre os clubs participantes, en función dos encontros disputados, co que se apoia economicamente a estas entidades que promocionan o deporte na súa contorna xeográfica e que, no caso dos conxuntos femininos, contribúen tamén a dar máis espazo e visibilidade á muller no deporte.
Neste sentido, a vicepresidenta da Deputación, Maite Ferreiro, remarcou tamén que “os premios son iguais na categoría feminina e na masculina. 1000 euros para o equipo campión, e 600 para o subcampión. Debería ser o habitual pero a miúdo vemos como os premios en valor económico e os recoñecementos son diferentes”.
Equipos participantes
FSF Castro, Vilalba FS, Monterroso FSF, Lieders Futsal, Concello de Begonte, UD Pastoricense, Korreos Guitiriz, Os Meigallos FS e Taboada Feminino son os conxuntos que participaron na competición feminina. O vindeiro 1 de novembro disputaranse as semifinais, Vilalba FS-Lieders Futsal e FSF Castro-Monterroso FSF.
Na categoría masculina competiron SD Xove, Prone Lugo AD, Ribeira FS, Santa Isabel Outeiro de Rei F.S., Praias de Barreiros, Vilalba FS, Concello de Begonte e CP Casás. As semifinais, que se xogarán tamén o 1 de novembro, serán Lugo Sala-Concello de Begonte e SD Xove-Vilalba FS.
