A Feira de Rubia Galega, coa que colabora a Deputación, reuniu a 130 cabezas de gando

O Presidente en funcións, Darío Campos Conde, xunto ao Presidente de ACRUGA, César Dorado Pin, participaron este sábado, no recinto gandeiro do Concello do Corgo, no XXXII Concurso Nacional e na XCI Subasta de Gando Vacún Selecto de Raza Rubia Galega, organizada por ACRUGA e que conta coa colaboración do organismo provincial. Esta cita, reuniu a 130 cabezas de gando de raza rubia galega de diferentes explotacións gandeiras.

Campos Conde sinalou que “esta feira, xa asentada na provincia, é a máis importante do ano para os gandeiros da raza rubia galega, que proceden tanto da Comunidade Galega coma do resto do país. Neste evento pódense adquirir exemplares de moi boa calidade morfolóxica e xenética, co que incentivamos a economía local, especialmente no rural”.

Na poxa, que comezou ás 12:00 horas, houbo 25 exemplares, 12 procedentes de explotacións gandeiras privadas, 4 machos de ACRUGA e 9 xatas preñadas na Granxa Gayoso Castro da Deputación. Ademais, Caixa Rural ofreceu axudas de 200 euros para a compra das femias e de 300 euros para os machos.

No concurso, presentáronse 101 animais, 80 femias e 21 machos e recibiron premio os tres primeiros clasificados de cada categoría. Foron as seguintes:

-    Sementais de máis de 26 meses
-    Xovencas de 14 a 26 meses
-    Becerros de 8 a 14 meses
-    Vacas paridas, femias de máis de 42 meses
-    Xovencas de 18 a 42 meses
-    Becerras de 8 a 18 meses
-    Machos e femias de ata 8 meses de idade

Máis colaboracións
O Executivo Provincial mantén unha importante colaboración con ACRUGA, pois nos vindeiros catro anos achegará un total de 1,4 millóns de euros. Nesta iniciativa inclúense axudas directas, de ata 500 euros, a explotacións lucenses polo primeiro parto das femias reprodutoras e ademais unha segunda liña de colaboración que implica a recría e mellora xenética dos animais nas instalacións da Granxa Gayoso Castro.